跳高女神:有另一個楊文蔚同我講嘢....

作者:Ellen    發表日期:2017-06-02 20:31:03

「我覺得比賽前好似有少少精神分裂,成日會有兩把聲,不停同自己講:楊文蔚你到時要點樣做。」跳高女神楊文蔚(Cecilia)月頭跳出1米88打破港績,藉甜美外貌和弗爆身形,人氣即時爆晒燈!私底下的Ceci開朗健談,卻自爆是一個自信爆棚,甚至有自閉和精神分裂的運動員,聽起來複雜又有趣,讓我們一起了解楊文蔚的內心世界。

走進拔萃女書院,楊文蔚由踏入母校一刻,就仿似一隻「開籠雀」,與師妹黃浣嵐「雞啄唔斷」,由田徑隊談到學校老師,回憶一一湧上心頭。「我有幾年無返嚟,今次返嚟見到一班着住校服嘅學生,突然有種以前返學嘅感覺。」由排球女將轉型跳高,Ceci說起排球,同樣手舞足蹈:「當時好多隊友同我講,我跳起殺波嗰陣,成個世界好似靜止咗咁,因為我跳得高,同埋可以騰空好耐。」

「賽前自己同自己講嘢」

由學界到今天成為今次香港紀錄保持者,楊文蔚坦言自己比賽時,有時會自閉,有時更會覺得自己精神分裂:「最近好多個比賽賽前,我不停同自己講嘢,好似有少少精神分裂咁,自己會叫自己個名:楊文蔚唔該你一陣比賽時,注意你每一步,要點樣跑出去,踩準每一步,心入面成日都會有兩把聲,自己幫自己做心理輔導。」平日開朗健談的Ceci,更搞笑形容自己比賽前會變自閉:「我會自己坐喺度無表情,淨係諗跳高,所有情緒都會在跳高的一下才釋放出來。」每個人釋放壓力的方式都不同,女神之所以一躍成為香港紀錄保持者,最需要就是保持良好的心態。

以1米88刷新香港紀錄後,楊文蔚回港依舊保持謙遜,但她卻道出自己的真實性格。「運動就係需要有少少自大,最近出去比賽,我會諗,你身高高過我,睇住嚟,我一定會跳得高過你所有人,因為我彈跳力爆棚!」

「人生有許多事情,正如船後的波紋,總要過後才覺得美。」身為運動美少女,楊文蔚DSE修讀中國文學,訪問當日大拋書包,以余光中的四個假想敵形容自己的運動員生涯:「好多時候你做緊嘢時候覺得好辛苦,好辛苦練習,但當你過咗1米88,全部嘢都會值得。」Ceci之後目標,希望可以穩定跳出1米89的高度,之後再挑戰1米90,並為2018年亞運努力!

東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20170519/bkn-20170519000747836-0519_00882_001.html

本文固定鏈接: http://www.kennamhk.com/11143.html
轉載請注明:Ellen 2017-06-02 20:31:03 於 最新熱點信息 發表

上一篇: :下一篇
返回頂部